امبارح روحت البيت مش مصدقة ان الأسبوع الغم ده خلص، الاسبوع اللي كله احباطات ومحاولات فاشلة بلا اي سبب
سعيدة وطايرة من الفرح جهزت محشي وفرخة طبخت واكلت واكلت تبمون وشغلت همام يحيي مع بلال فضل ونمت على صوتهم بيتناقشوا في موضوع عميق
النهارده صحيت عملت قهوة ونفسي اشم ريحة كيك سخن بيتعمل
ريحة الخميرة والخبز مع الشتا ويوم الاجازة والقهوة وتيمون نايم
يالها من حياة رائعة  

عندما يأتي الشتاء
اشتاق اليك ايها الحب
اشتاق لضمتك وسط الرياح وتحت الامطار
اقلب بين نغمات الغنوات التي احبها، واحب ان تهديها لي.. كم هي جميلة انغام الشتاء وكم ستكون اجمل منك
ارتب لك المفاجات التي لابد ان تأتيني بها
اراجع ابيات الشعر التي اود لو تتلوها على مسامعي
اطالع افلام الشتاء التي سنشاهدها معا حتما...
ابحث عنك كل شتاء وانتظر ان نطوف بشوارع المدينة ناعمين بدفئ المحبة وسط رائحة الخشب المبرود الممزوجة برائحة الشتاء وكل اصوات الشوارع من باعة و تلفاز وناقلات وصوت درويش باذني وحدي وبكائي حين تغفلني لتفاجأني جاثيا على ركبتك تطلب مشاركة الحياة والانفاس والاحلام والخطط المستقبلية
انتظرك يا حب فتتظاهر انك قادم لتغيب اكثر وتبعد اكثر

في الشغل محدش بيغلط نفسه
محدش بيقول انا اللي نسيت
محدش بيقول اوبس اسف غلطت
كل حاجة بتعلم عليك وتتعرف كأنها جزء منك. فلان اللي بينسى ويغلط ويلغبط
الحقيقة ان مناورات الشغل تقيلة، اتقل من الشغل نفسه وانا مليش خلق ليها
بفضل يتقال ان رضوى بتنسى ولما يجي حد يستغلها ويقولي احنا قلنا كذا بس انت ناسية اقوله انا بنسى بس فاكرة اني كاتبه الموضوع ده تعال نبص كده...
في الشغل محدش بيبقى عليك ولا بيدافع عنك من وراك
في الشغل البني ادمين حاجة تانية غير البني ادمين
عمري ما حسيت ان حد بيطعن في الناس عشان لقمة العيش والفلوس والرزق وبتاع، لكن في حاجة في اجواء الشغل بتطلع من الناس اسوء حاجة ممكن تحصل منهم
صراع الغابة ابو رمح مكنش بدافع البقاء،
او كان بس اتورث بلا مبرراته كهواية

في بدء الرحلة لوح مولانا بنبوءة واختفى
سيعود كل منكم بروح مختلفة عن التي اتى بها
اكاد اقسم انه قد حدث،
افتح عيناي صباحا اجوب بها بحثا عن الفراش الذي يجاور فراشي وتتواطأ اذناي فاسمع صوت ضحكة الحلوة تقول لي خلاص كلهم صحيوا اصحي بقى
اخط بقدمي ارض القاهرة المكروهة فعلا وانا ابتسم تذكرا لكل الذكريات، اتذكر الجمع والصحبة والضحكات والدعم طوال اليوم
المحبة مربكة الى الحد الذي قد يجعلني احاول الهروب بخشونة من التورط فيه لكن الصدق غالب، الصدق اخاذ
المعارك ضد المحبة خاسرة قطعا
احب ضحكات الاصدقاء