اولى رابع
كان فصلى فى الصف الاول الاعدادى
فاكره تفاصيله كلها
مكانه مكان كل واحده من زمايلى واسمها ثلاثى وتسريحه شعرها واغانى مصطفى قمر اللى كنا بنغنيها وقتها فى اوقات ما بين الحصص
فاكره شكل الاقلام اللى كنا بنستخدمها ودرس الانجليزى اللى هلكنا فيه من الضحك على وصفه سندوتش الموز بالتونه والشيكولاته بالمكسرات والجبنه الرومى ومقلى ومحطوط فى فرن نص ساعه - فاكره مستر حسام بتاع العربى وفاكرة سمر سيد اللى ضربها بالقلم لما ضايقتنى قدامه فاكره اد ايه كان بيحبنى وفاكره انه قال ان فى الفصل كله فى واحدة بس اللى بيتمزج من تعبيرتها وتلاوتها القرآن فاكره لما سألته كنت تقصد مين فاكره ابتسامته وهو بيقولى تفتكرى فى غيرك
فاكره مس هاله كليب بتاعة العلوم لما جابت سمكه بلطى عشان تشرحلنا عليها وقلبت ريحه الدنيا بحالها
فاكره مس اميرة بتاعة الالعاب لما مكنتش بتنزلنا نلعب عشان تعد تتكلم معانا عن مستر محمد سعد بتاع الانجليزى اللى لما اتجوزته مبقتش بطيق تطلع دور هو قاعد فيه
فاكره مدام سلوى بتاعة الفرنساوى اللى كانت بتقولى محدش بعد كده هيقولك ازاى تبقى بنت اسمعى منى - ومسمعتش منها ومحدش بعد كده قالى
اكتر حاجه فاكراها هبه
هبه محمد ماجد
كانت ساكنه فى بيت رقم 24 فى شارع متفرع من شارع احمد عرابى الشارع للى قدام عمرو افندى الشقه اللى على يمنها كانت ساكنه فيها ميار الببلاوى قبل ما تتجوز ومروة الببلاوى اللى كانت زميلتنا فى المدرسه رقم تليفون هبه كان على ما اتذكر 3334215 والرقم التانى 3334218
انا وهبه كنا كل يوم نخرج من المدرسه نجيب لبعض ورد من عند الراجل اللى جنب المدرسه
كل يوم نكتب لبعض جواب كل فتره حد فينا يحاول يعمل للتانى مفاجأه وتصادف ان التانى يبقى عامل نفس المفاجأه
كنت كل ما اشوف مشهد عبد الحليم فى وهو بيقطع عشروميت ورقه عشان يكتب كلمتين فى جواب افتكر الايام اللى كنت بعد اخطط لجمله اكتبها لهبه والف وادور واستعين بروايه لعبير والقيها هى كمان كتبالى نفس الجملة بنفس لون الحبر
لما من كام سنة قابلت هبه صدفة فى الشارع سلمت عليها بس سلامنا كان فى حاجه غريبه حاجه كأننا بنقول لبعض انت مين مش انت بتاعة الايام اياها دى
متكلمناش كتير ولا فكرنا بعض باى حاجه من الحجات المدرسه زى ما دايما لما بقابل حد من المدرسه بنعمل جرينا من بعض بتقنيه عجيبه
امبارح بس حسيت انى محتاجه حد يكتبلى جواب
نفسى فى جواب مكتوب بخط الايد وورده
ورده مش بوكيه ولد هولندى
وشريط كاسيت فيه اغانى هشام عباس وعمرو دياب ومحمد فؤاد
اشتاق الى تمشيه على الكرنيش ولو طلبت اكل وشرب يعنى وكان ولا بد يبقى دره وترمس وبطاطا وحمص شام وشاى بالنعناع وسحلب وسميط وجبنه قديمه
نفسى فى خروجه للقناطر على سطح مركب من اللى مليانين عيال شكلهم مشبوه واركب الحمار ونفسى اطلع الهرم اطلعه فوق
نفسى امشى فى وسط البلد نمشى مش نتمشى بعربيه نمشى لحد ما نهلك وناكل ايس كريم من العبد مش من باسكن روبينز
تفسى اسمع اغنية ليلة امبارح مجانيش نوم مش خيط القصب على شال امى
نفسى العب مع احمد بنك الحظ مش اكس بوكس
نفسى افطر
نفسى جدا افطر
افطر طعميه سخنه او فول او البيضه المنيله اللى كانت معقدانى دى مش قهوه من غير سكر تقريبا وفيها 4 معالق بن
نفسى اركب اتوبيس 196 واعد على التابلوه اللى قدام السواق
نفسى اصيف فى المعموره او سيدى بشر او المساعيد مش فى الساحل
نفسى احلم بخروجه كل اخر اسبوع مش اقول انا هعد فى البيت النهارده
نفسى اروح انا واخويا نجيب ساندوتشات من بركه اللى جنب مدرسته
نفسى اجيب ورده من الراجل اللى كان جنب مدرستى وابعتها لهبه مع عدد من ما وراء الطبيعه وشريط لمصطفى قمر