اهلا دوري
انا سمكة
ذاكرتي مش اد كده....اه دي وراثة في عيلتنا أو يمكن مش وراثة مممم هي عيلتي فين
بنسى كل حاجة فور حدوثها...لا بشيل لحد حلو ولا وحش
بالتالي مش مستنية من حد حلو ولا وحش
يعني مثلا مثلا يعني لو سمكة كبيرة جت جنبي دلوقتي وقربت اوي اوي اوي وطبطبت عليا اوي وخلتني احس انها مني اني منها وان الدنيا مش هتكمل غير واحنا مع بعض كل لحظة مش هفتكر امتن ليها واشكرها ولو بعدها سابتني ومشيت بعيد ... مش هفتكر اصلا انها عدت عليا
انا التطبيق العملي و المعادل الحي لطريقة العلاج بتاعة هنا ودلوقتي
انا دلوقتي حالا عايزة امشي مع تيار الميا اللي هناك ده حتى لو بعده هقابل وحش مخيف وحيتان عطشانة لاكلة سمكة في حجمي
مش مهتمة بمهاراتي ومش فكراها
يمكن بعرف اتكلم حيتاني وتركي وفرنساوي ...مش فاكره
يمكن فعلا بعرف اغني وانا معرفش
يمكن اكون بعرف اعمل حاجات كتير مش فكراها بس مش هفتكرها
مش هفتكر غير اني مبسوطة حالا
مش عايزة اعرف من المستقبل حاجة مش هفتكر اللي هعرفه
مش عايزة أسعى لحاجة
كده كده مش هفتكر رحلة سعيي ولا اعتز بيها
مش مهتمة بمستقبل العلاقات ولا ماض فات
مهتمة بس أن محدش يضايقني هنا ودلوقتي
بس لما الحياة تكشرلك عارف تعمل ايه
عوم واتمخطر عوم واتمخطر مخطر مخطر
No comments:
Post a Comment