حاضر هحكيلك
بس خليكى فاكره ان انت اللى طلبت منك احكيلك
احكيلك على مين على مين على مين
اختارى اسم
اكيد هلاقى فى معارفى حد كوميدى على الاسم ده
نعد نشرحه مع بعض
اختارلك انا ؟؟؟
اه هختار عشان ننجز
حكتلك عن ساره قبل كده ؟
لاء مش ساره عبد العال
ساره نصر
بصى يا ستى
ساره دى كانت اول فتاة فى مدرستى تجيب موبيل
ويا لها من فعله
لذلك مكنش فى مدرس من المداريس يتخيل ان ساره لما بتعد تحت الديسك بطنها وجعاها بتكون بتتكلم فى التليفون
توضيح صغنون
ساره كانت بتقضى النهار فى الحصص كلها بطنها وجعاها
وبالليل كله على الام اس ان تشات لاء يا بنتى مش المسنجر ايامها كان الام اس ان فى اتشات زى بتاع الياهو كده
بعد كده عملوه بكرديت كارد فتره واعتقد دلؤتى قفلوه خالص
المهم يا ستى
قربت من سارة فى فترة ما
مش فاكره الملابسه المهم قربتلها
بعدها بدأت اسأل نفسى هى سارة بتجيب كلام منين يكفى حصه العربى والرياضه والاحرى كيف يمكنها فعل ذلك فى حصه الجغرافيا
بس يا ستى
خدت بعضى واتسحبت فى حصه الالعاب وقاومت رغبتى الملحه فى لعب ماتش كره السله اقطعهم فيه ( مش فاكره اذا كنت قلتلك ولا لاء انى كنت كابتن كره السلة فى المدرسه بس اكيد انت عارفه والا ازاى عرفتى انى كنت هحدفله فلوس وانه كان هيجبلى الباقى )
المهم قررت ان بطنى توجعنى
وانى اعد جنب ساره اللى بطنها وجعاها
ولزقت ودنى فى بقها زى القراضه
انى اسمع حاجه ! ابدا
صوصو صو صو
كل اللى سمعته بعدها ضحكه رقيعه ويا قليل الادب بصوت رقيع
قررت ان مكانى فى الفصل مش عجبنى
بعيد عن السبوره وانا نظرى ضعيف وبصدع لما بحاول اشو ومش بسمع المستر وهو بيتكلم
ورحت قعدت جنب سارة
وبطنى وجعتنى ونمت على الديسك وانى اسمع حاجة ابدا
صو صو صو
وضحكه رقيعه
ويا قليل الادب
قررت ازوغ من الباص واروح مع سارة
مشيا على الاقدام
تليفونها فصل
وبدأت تحكيلى عن قليل الادب اللى واجع بطنها طول الحصص
اد ايه جميل
اد ايه طويل
اد ايه رقيق
اد ايه بتعيط من رحتها بيه
بتعيط من فرحتها !!!
اه وربنا قالت كده
تانى يوم يا ستى
جت سارة معيطة
قلت فى عقل بالى عادى بقى فرحانه
جت قعدت جنبى
وحكتلى
اصل انا قلت لمحمد انه اول واحد اعرفه
وانى لما عرفته كنت اول مره ادخل على الانترنت واكلم ولاد
وتليفونه فصل عشان مدفعش الفاتورة لان اهله مرضيوش يدفعه 5000 جنيه مكالمات فقال يكلمنى من عند ايمن صاحبه فلقى نمرتى عنده بالصدفه ! ولما سأله ايمن قاله ان دى سارة اعرفها من ام اس ان تشات
-يا حالولى طيب وهنعمل ايه دلؤتى يا سارة ؟
- مش عارفه يا رضوى ، بصى ممكن اطلب منك طلب ؟
-عنيا يا حبيبتى
-كلميه انتى
-انا ؟؟!
- ايوه يا رضوى انتى هتعرفى تقنعيه
- ايوه يا رضوى انتى هتعرفى تقنعيه
- اكلمه انا هخاف
- الو يا محمد
- اي اى اى ايوه يا سا سا سا ساره
نزلت التليفون بعيد وقلتلها الحقى يا ساره الواد جاله شلل نصفى
-هههههههههههههه لاء هو بيتكلم كده
- بجد والله
- اه يا بنتى عادى
- طيب ، لاء يا محمد انا مش ساره انا رضوى صحبتها
- اهل اهلا يا رض رضوى ، سا سارة بت بتحكى عن عنك كتير
( يا ليله كحلى احنا هنقضيها تهتها كده ولا ايه )
-ط طي طيب يا محمد انا كنت عايزه اس اسأ اسألك عن موضوع م مهم ججج جدا بالنسبالى
- ات اتفض اتفضلى طبعا
- وحياة ابوك يا محمد تقولى هى سارة لما بتقولك يا قليل الادب بتكون بتقولها ايه
ضحك وضحكت سارة وضحكت دعاء صاحبة سارة وضحك ايمن صاحب محمد لما حكاله وتخيلت ان الحكايه خلصت على كده وانهم عاشوا فى تبات ونبات وهيخلفوا ايمن وااتنين بنات
بس معشوش فى تباتات
كلمنى محمد بعدها بفتره منهار وقعد ربع ساره يقولى س س سا ســــا
-خلاص فهمت سارة ، مالها
-ســـا ســا ســـا
- ايوه ايوه سارة ، مالها يا ابنى ماتت
- لاء ســـا ســــا ســـــابتنى
- يا نهار اسوخ بعد كل وجع البطن ده ، طيب اقفل هكلمها واكلمك تانى
- الو ايوه يا بنتى ازيك ايه يا بنتى فى ايه محمد بيقولى كلام عجيب كده انتوا بجد فركش ولا ايه
حكتلى ان قربها اللى كانت بتموت فيه طول عمرها وساكن تحت بيتها نطق اخيرا وانها كان لازم تفهم من الاول ان اصلا اهلها مش ممكن هيوافقوا بحد غريب عن العيله وبتاع
رجعت لمحمد وبعد ربع ساعه كملها على بعضها حسبى الله ونعم الوكيل وعشنا حياتنا
ومرت ايام وتواريخ وروح يا ديسمبر تعالى يا نوفمبر
سيبك من التفاصيل يعنى بس ايه انا كنت بطبع ورقه فى سيبر جنب بيت جدتى ما انتى عرفاه
عشان ايه ( بغض النظر عن التفاصيل يعنى ) البرينتر فى بيت جدتى كانت محشوره فيه ورقه حطتها بالمشقلب
قوم ايييييه
قوم انا لقيت ح بيندهلى من ورا ضهرى وسلامات واشواقات ثم فهمت انهم سالى ورضوى اللى معايا فى المدرسه
وان السيبر ده بتاع قرايب رضوى اصلا
وبس يا ستى بقينا بنتقابل كل يوم فى السيبر ده ونعد مع بعض شويه
وبعديين فى مره من ذات المراير دخل السيبر ميييين
محمود
محمود ده بقى يطلع مين
واحد جار ساره وساره كانت بتقولى انه بيعاكسها فى الرايحه والجايه ومضايقها
وفى مره من ذات المرارير
كلمها فى التليفون وقالها انه سرق نمرتها من تليفون طنط ام اسلام وانه معجب بيها جدين جادين
وقوم ساره مسكتتش
بعتتله قربها اللى كان ساكن تحتيهم بقى واللى هو مشروع خطبها بقى دلؤتى
قوم طحنه ضربا حتى مات الولد مزعورا
قوم لقيت الولد داخل عادى خالص لا ميت مزعورا ولا اى حاجه وكمان بيسلم على محمد ابن خالة رضوى اللى هو صاحب السيبر اللى انا رحته لما كنت محتاجه اطبع حاجه والبرينتر فى بيت جدتى محشور فيها ورقه حطيتها بالمشقلب فقابلت رضوى وسالى اللى كانوا معايا فى المدرسه هناك وبقينا بنتقابل هناك كل يوم
رحت انا مسكتش بقى
رحت اخدت محمد ابن خالة رضوى اللى كانت معايا فى المدرسه واللى هو صاحب السيبر اللى انا رحته لما احتجت اطبع حاجه والبرينتر فى بيت جدتى محشور فيه ورقه حطتها بالمشقلب فقابلت رضوى وسالى اللى كانوا معايا فى المدرسه هناك وبقينا بنتقابل هناك كل يوم
قلتله خد هنا يا محمد انت كويس وابن حلال ازاى تصاحب الناس دول وتسلم عليهم عادى خالص كده
قالى ناس مين
قلتله محمود ده
ده بيعاكس ساره صحبتنا
قالى ساره مين اللى جت معاكوا هنا قبل كده
قلتله اه
قالى لاء محمزد ميعاكسش
قلتله يا ابنى ده عكسها واخد نمرتها من تليفون طنط ام اسلام وكلمها وهى بعتتله قربها دور فيه الضرب لما عدمه العافيه
قووووم ايه
قوم محمد راح اتكلم مع محمود قوم محمود قام اتنفض وخرج بره السيبر
قوم انا قلت لمحمد شفت بقى اهو اتكسف على دمه
شويه ولقينا محمود راجع بشويه ورق
طلعوا جوبات من سارة !!!!
اه والله وبخطها
وراح ادانى ورقه منهم قالى دى كانت اول حاجه بعتهالى
انا كنت ماشى فى الشارع لقيت مشبك وقع عليا مشبوك فيه ورقه مكتوب فيها رقم تليفون وكلمنى ضرورى
ورانى الورقه
رقم سارة وخط ساره
المهم بعدت انا بقى عن ساره بعد ما بعتتلى ايميل محترم تقولى انى دمرت حياتها بأعتبارى صديقه غير مخلصه مخفتش عليها وممحفظتش على اسرارها وفضحتها قدام الناس كلهم
بعد كام شهر كلمتنى ساره بتعيط وبتقولى انها مش عايزه من الدنيا صحاب غيرى وعايزه تقابلنى ضرورى
قابلتها
قالتلى انها سابتهم كلهم وعلى علاقه بأسلام ابن طنط ام اسلام وعايزانى اقنعه يصلى !!!!
مرت ايام وشهور وسنين
وكلمتنى سارة بتعيط وبتقولى مش عايزه من الدنيا صحاب غيرى
قابلتها
قالتلى انها على علاقه بعبد العزيز بس المشكله ان عبد العزيز اكتشف انها كانت على علاقه بهيثم وعايزانى اقنعه ان دى حاجه طبيعيه وانها لما قالتله انه اول حد فى حياتها كانت مش عايزاه يزعل بس مش اكتر
بصيت فى عنيها
وبصدق سألتها
- سارة هو انتى كنتى بتقولى لمحمد يا قليل الادب ليه ؟؟؟
No comments:
Post a Comment