تى اى داتا اسوء شركه انترنت فى مصر

مسدده اشتراك الخدمه لحد يوم 8 شهر 7
فى يوم 18 مايو 2011 اتسرقت الكابلات وبالتالى خدمات الانترنت اتقطعت fair جدا
مشكلتى ان التليفونات رجعت يوم 22 من شهر 7 وخدمه الانترنت لسه مرجعتش اتصلت بTE Data اسرع خدمه انترنت فى مصر بقى وهيرجعولى الخدمه بسرعه كان الرد "جارى تحديثات بعض البيانات وعاودى الاتصال بينا بعد ساعتين "الساعتين دول مخلصوش لحد انهرده
عملت مكالمات يوميه من يوم 22-7 ليوم 10-9
كل يوم ادعى يارب اللى يرد عليا يكون فاهم مش حافظ يارب ميكونش محمد عووووف يارب
دايما نفس الرد "طيب دلؤتى يا فندم جارى تحديثات اجهزتنا فى السنترال واول ما هتم التحديثات دى يا فندم هترجع الخدمه لحضرتك فورا يا فندم وبنطلب من حضرتك يا فندم معاوده الاتصال بينا فى اقرب وقت ممكن يا  فندم ، عند حضرتك اى استفسار تانى يا فندم شكرا باتصال حضرتك بتى اى داتا يا فندم "
بغض النظر عن الافأفه وان ناس بترد عليا كأنى بخبط على باب بيتهم وبقول فى مكوى لو سمحت
الحقيقه كان فى ناس كانت ظريفه جدا ومتعاطفه لابعد حد وعايزه فعلا تساعدنى بس مفيش حاجه فى ايدها
وصلت اخيرا لقرار انا هسيب تى اى داتا
فى المكالمه دى رد عليا حد لطيف جدا وسألنى عن السبب وحكتله اللى بيجرالى وتعاطف جدا وقالى قريب جدا المشكله هتتحل
المشكله اتحلت يوم 10 ستمبروكاتبوا فى الجرايد انقطاع الخدمه لعدة ايام "عدة ايام 4 شهور بتسموهم عدة ايام " ماشى وماله شركتنا برضو ومنظرها قدام الرأى العام يهمنا حمدت ربنا وبوست ايدى وش وضهر وقلت هطلع فى التلفلزيون اقول تى اى داتا ميا ميه وسونه اجدع ناس وكفى الله المؤمنين شر القتال وهو الواحد عايز من دنيته ايه غير الستر والصحه وخدمه انترنت مبتقطعش عشان يقدر يتفرج على فيديوهات  احمد زباضير براحته
وكانت المفاجأه قطعوا الخدمه يوم 12
اتصلت بيهم ليه كده يا ولاد الحلال
مدون عندنا يا فندم ان اخر اشتراك تم تسديده كان بتاريخ 8-7
طيب يا جماعه انا مختش خدمه مقابل ده
" مدون قدامى يا فندم ان الخدمه يا فندم كانت شغاله عند حضرتك عادى من الفتره 18 مايو الى الفتره 12 ستمبر "
انت قلتلى اخر فاتوره ادفعت كانت بتاريخ كام ؟
8-7 يا فندم
وهو عادى عندكوا ان الفاتوره متدفعش 3 شهور وتسيبوا الخدمه شغاله ؟
صمت فظيع
طيب ماذا تفعل لو كنت مكانى
حضرتك يا فندم ممكن احولك لقسم الدعم الفنى
اتفضل يا سيدى
عدى دقيقتين ورجعلى تانى
"استاذه رضوى حضرتك لسه معايا يا فندم "
معاك
هو للاسف يا فندم انا مش هقدر احول حضرضك للدعم الفنى عشان حضرتك مسددتيش الاشتراك
ولعت انا بقى
طيب اعمل ايه انا دلؤتى
حاضر يا  فندم هحول حضرتك يا فندم للقسم المختص يا فندم بس هو حضرتك سمعتى عن عرض back to school
شكرا حولنى
الراجل حولنى وطول ما انا على الانتظار قاعده ادعى يارررب محمد عوف ميردش عليا يارب محمد عوف ميردش عليا
الحمد لله محمد عوف مردش
رد واحد تانى قالى هو فعلا الواضح امامى ان حضرتك كانت الخدمه شغاله عندك طبيعى جدا لحد يوم 12 ستمبر
طيب يا استاذى ما تبص على المكالمات اللى انا عملتها
هو يا فندم مش ظاهر قدامى يا فندم غير ان كل الشكاوى المقدمه كانت بتتحل فى ساعتها
يا عم مفيش حاجه اتحلت كنتوا بتقولولى اى بلابلا لاه
طيب يا فندم ده الموضح قدامى دلؤتى
تحبى حضرتك اشرحلك عرض back to school ????
!!!!!!!!