الفطره تغلب ....احبانا

شغلنى موضوع الحنيه اللى نزلت عليا فجأه دى 

فما معنى ان اشفق على شخص من ان ازعل منه لحسن يضايق انى زعلت منه فيزعل

وما معنى ان اعتذرلاذهب الى اللامكان لانى خفت ان تغدر بى عيناى وتمطر ادمع فى غير وقتها حين رأيت الرجل ينحنى لينظف اسفل الطاوله التى تجاورنا
اكاد ابكى على بكاء كل طفل اقابله فى الطرقات
الا ان علاقة خاصه تقوم بينى وبينه فى اللحظه فتشغله عن البكاء
لماذا اصبحت اكثر جاذبيه بالنسبه للاطفال
ولماذا اصبحوا هم كذلك بالنسبه لى
ليلة امس قابلته تسعه شهور لو احسنت الظن هى كل ما حمل من عمر بقاه فى  الدنيا 

اصطنع البكاء لينتقل الى كتف امه بحيث يكون اقرب لى 

فطنت ذلك، حين نجحت خططته ضحك لى فى خباثه خيل الى انه غمز لى ايضا 

خبأ وجهه فى ملابس امه ثم نظر الى واطلق صيحه فرحه ( انها لعبه العوووووووو --بخخخخ ) كيف علم هذا العكروش انى احب هذه اللعبه
لاعبته قليلا ثم ادرت وجهى للناحيه الاخرى فى محاوله ان اقاوم ان اخطفه واجرى
تصنعت الانشغال باى شيئ
جذبنى من شعرى برفق لا اعرف كيف اتقنه
نظرت اليه فقهقه ثم وضع اصبعه فى فمه وعلت ابتسامته
الامر يزداد جاذبيه حتما سأخطف ذلك العفريت اللبق
هنا فقط لمعت الفكرة
الامر هكذا اذا
حنين للامومه
العذاب الذى لوح ابى عدة مرات انى ساعانيه ان نجحت فى ادراج اسمى ضمن قائمة العوانس
هذا هو الامر اذا
اشتاق الى ابن لى ،لما انكر هذا واى فتاة تستطيع انكار هذا
لكن لكل متعه ثمن
وثمن هذه المتعة لا ادعى ابدا اننى استطيع دفعها
لا ادعى انى املك الثمن اصلا
الوصفه كما تقول النساء المحنكات اللاتى قابلتهن سهله للغايه 

عايزه ابن
 لازم اختار ابوه
واخطط كيف ارمى الشباك نحوه
كل بمدخله ومفتاحه
احدهم بتصنع الادب ورقه الحديث والاخربادعاء عمق الفكر واحدهم يكفيه ان يعرف كم انا ماهره بالطبيخ و......
او يكفى ان اسلك الطريق الايسر واختار ممن القاهم القدر على عتبه منزلنا يطلبوا القرب
ثم استحمل قرف اللى خلفوه وعقدهم النفسيه ومواويل معلش بقى ابنها ومش قادره تصدق ان حد هيخده منها وبتاع
والتلميحات السخيفه عن ان بى عيب ما انتى اللى عامله الكيك ده يا حبيبتى ؟ حلو بس ابقى اتصلى بيا وانا اقولك تعمليه ازاى بطريقه اسهل وبيطلع حلو ومش معجن كده ، انما انت تخنانه حبه لاء لاء لاء خدى بالك تلقيكى بتاكلى بره ولا حاجه مصل انتوا كده اليومين دول بتستسهلوا الفلوس انما هو شعرك مقصف حبه ولا هو كده اصلا .....
واتحمل بقى ان دى بنت خاله اللى كانت عنها عليه وان مامتها كرهانى ده عادى عشان انا ضيعت امل حياة بنتها
مطلوب منى اتحمل اصحابه ووقاحة زوجاتهم
مطلوب منى اقطع علاقاتى - اى علاقاتى المهم اتقطع وخلاص
مطلوب انى ازقطط وقت ما يكون الباشا عايز يزقطط وانكد وقت ما حضرته يقرر ينكد
اشياء كثيره تصيب بتضخم البنكرياس على ان اتعامل معاها على اساس انها من الطبيعى انها تمشى عشان المركب تمشى
والست تعشش والراجل يطفش
وانا اعشش ليه انا على راجل مش طيقاه مقدما ولا طايقه اهله ولا طايقه صحابه ولا طايقه تفاهته وتحكماته لمجرد ان اهله فهموه انه رجولته هتكتمل لما ارجع البيت بدرى ومخرجش اصلا الا معاه ومكلمش حد غيره وانه كل ما يقهرنى اكتر واكتر كل ما درجته كراجل هتعلى وتعلى
كل ده عشان غريزه الامومه لعنها الله نقحت عليا
تراودنى فكره ان اضحك على احدهم واتزوجه انال غايتى واخلعه بعد السبوع
اتراجع فالامر غير مضمون بالمرة فماذا لو ان الله ابتلانى بالعقم يا ليلة دى تبقى لبسة العمر
او ان طفلتى نشأت دون اب فى الجوار فتزداد فتره مراهقتها تعقيدا ، تقع فى حب استاذها ذو الشعر الابيض ، يطلع ابن ستين فى سبعين ويستغل الحب ده والكوبايه تتكسر والشباك يترزع واعيش انا بعارها او اقتلها واقتله وتحصل المعجزه وبدل ما اقابل احمد عز فى جولز جيم كما كنت احلم اقابله فى ردهات السجن بين عنبر الستات وعنبر الرجاله
لا لا مش حلو موضوع الطلاق ده
ولا الجواز
ولا الخلفه ... اه ولا الخلفه اصلا
ثم ان اصلا موضوع الامومه ده تخلص طموحاتى فيه عند طفل عنده 5 سنين بعد كده مدارس وغباوه
ونمر قليلة وخناقات عشان بسلامته عايز يطلع رحله مثلا
وقاعده على النت طول الليل والنهار منغير مذاكره
وتزويغ من المدرسه والدروس ويمكن سجاير ومخدرات واذ ربما جواز عرفى وفضايح
انا ايه اللى يدخلنى فى الهبل ده انا
لا لا لا بلا جواز بلا كلام فاضى
انا كده زى الحلو اوى
مالها القطط
ظريفه لطيفه بتعيط لما تحب تاكل وتلعب بالكوره لما تشبع
وكفى الله المؤمنين شر القتال