عمري حياتي سيبتك غصب عني ورغم اني مستنياك تكلمني دلوقتي حالا تقولي نامي ياحبيبتي وخديني ف حضنك 0اناواثقه انك جنبي عشت معاك 5 سنين بكل عمري ياحياتي دي مش كلمتي الاخيره اناكل يوم هبعتلك رساله ع تليفونك وهستناك ترد عليا عشان انت وعدتني مش هتسبني ومش هتخليني انامعيطه انابموت يامايكل الله يخليك متسبنيش وحشتني قوي ياعمري
..............................................................
ده كلام فيفيان اللى خطبها راح منها فى احداث انهرده
بشكل ما اكتشفت فى نفسى انانيه عجيبه انهرده
لما ضبطت نفسى بطمن على من يهمنى امره من المسيحين
ثم من يهمنى امرهم من ناس بتعدى فى التوقيت ده من مسبيرو او كوبرى اكتوبر
ثم من ساورنى القلق عليهم
كله تمام الحمد لله
صديق واحد اخبرنى ان فى ناس طلعوا على عربيته بالشوم خبطهم يمين وشمال ورجع بالعربيه على الكوبرى عكسى ، كوبرى اكتوبر اتمشى عليه عكسى
سألته انت تمام ، العربيه تمام ، خير كده كله عال العال انام انا بقى
لحد ما سمعت عن فيفيان
صعبانه على كل الناس
اسمها هو اللى خضنى كانت لى صديقه وجاره وزميله مدرسه تحمل نفس الاسم الثنائى
فتحت صفحتها اللى الناس كلها حطاها
قلبى وجعنى
تخيلت ام الولد
وكام ام تانيه عنيهم هتتصفى من البكا على حته من قلبهم راحت فى غمضه عين
وكام حبيبه تانيه نايمه متقطع قلبها او مش هتنام اصلا
كام بنى ادم مسلم بقى مسيحى متظاهر بلطجى جندى فى الجيش كام حد راح ضحيه الايه
الولا حاجه
سألت المسيحين كنتوا تعرفوا حاجه
قالوا المسيحين كانوا خارجين فى مسيره سلميه بالشموع
شموع امال الشوم ده جه منين
سألت المسلمين اكدوا انهم خرجوا مسلحين بلفتات تحمل انيل الشتايم فى المسلمين
سألت نفسى مين اللى هيشيل ذنب الدم
مين اللى يقدر يعوض المسكينه دى وامثالها عن لحظه معشوهاش مع حبايبهم
طبعا العمر مكتوب بس العقل فى لحظات معينه لا يقوى على الادراك
فى لحظه حسيت ان الدنيا مش مستهله خالص ان حد يزعل من حد ا يهاجم حد او يسخر من فكر حد
مفيش حاجه هتعزى فيفيان ولا هترجعلها اللى راح منها
ممكن تكون فى حاجه تمنع ان ده يحصل لحد تانى
بس ده برضو مش هيشفى جرح المسكينه
No comments:
Post a Comment